Abdixhiku akuzon Vetëvendosjen për “uzurpim antikushtetues”: Thirrje për përgjegjësi penale

Kryetari i LDK-së, Lumir Abdixhiku, ka reaguar pas ndërprerjes së seancës konstituive nga kryesuesi Avni Dehari, duke e cilësuar veprimin si vazhdim i uzurpimit antikushtetues nga ana e Lëvizjes Vetëvendosje.

Në një deklaratë për media, Abdixhiku tha se deputetët e LDK-së qëndruan në sallë për të shprehur qëndrimet e tyre, ndërsa përmendi se deputetja Hykmete Bajrami mbajti fjalën e saj, ndonëse disa të tjerëve, si deputetit Zogaj, u ishte ndaluar kjo e drejtë.

“Le të jetë një fillim i diskutimeve parlamentare pas uzurpimit antikushtetues që po i bën Kuvendit partia e parë. Ata le të ikin, ne le të flasim”, tha Abdixhiku.

Ai kritikoi ashpër Vetëvendosjen, duke theksuar se për herë të 41-të me radhë partia e parë nuk po arrin të ushtrojë përgjegjësinë kushtetuese për krijimin e shumicës parlamentare.

“Sot, sërish, partia e parë vendosi me plot arrogancë të injorojë rendin e ditës, të cilin e kishim dakorduar paraprakisht në takimin institucional me z. Glauk Konjufca. Ky rend u ndryshua njëanshëm, pas shtatë seancash, nga një deputet më i moshuar – i cili nuk ka të drejtë për një vendim të tillë”, theksoi ai.

Duke e cilësuar situatën si “pengesë jokushtetuese”, Abdixhiku paralajmëroi se kjo përbën një shkelje të rëndë që mund të ketë pasoja ligjore.

“Është përmbysje e rendit kushtetues me vetëdije dhe qëllim – dhe për këtë do të ketë përgjegjësi penale një ditë. Partia e parë mund të ketë një ulëse, por nuk mund të kapë Kuvendin”, përfundoi Abdixhiku, duke ftuar për më shumë transparencë dhe debat para qytetarëve.